Skip to content

Te Puka Arotake mō ngā Wāhanga Ako o Te Marautanga o Aotearoa - Pūmanawa Tangata

He Kupu Whakataki

E tipu e rea mō ngā rā o tōu ao.
Ko tō ringa ki ngā rākau a te Pākehā hei ara mō tō tinana.
Ko tō ngākau ki ngā taonga a ō tīpuna Māori hei tikitiki mō tō māhunga.
Ko tō wairua ki tō Atua, nāna nei ngā mea katoa.

- Tā Apirana Ngata

Ko tā Te Marautanga o Aotearoa, i whakahoutia ai hei marau e tōtōpū nei ōna mōhiotanga, he tautoko i te mokopuna ki te whiwhi ki ngā mōhiotanga me ngā pūkenga e tika ana kia pai ai tana ako i ngā rā o tōna ao, kia rongo ai ia i te angitutanga, kia kaha ai hoki tana uru ki ngā mahi me ngā umanga, ki te pāpori, ki ōna hapori anō hoki.

E tono ana mātou i ō whakaaro me ō tirohanga hei hāpai i te tāraia o Te Marautanga o Aotearoa hei marautanga ka:

  • mātua tautoko i te mokopuna mā ngā akoranga kua āta whakaraupapatia e taunaki ana hoki i te whanaketanga.
  • whakaū i ngā wawata o te whānau ki te whakatipu i te mokopuna e kaha ana ki te kōrero i te reo Māori, e kaha ana ki te pupuri i ngā tikanga Māori, e aumangea ana hoki i te ao Māori.
  • whakarite i te mokopuna kia puāwai i ngā horopaki kanorau me ngā horopaki e huri nei i te motu me te ao whānui. Ka tika hoki te whāngaihia o te mokopuna ki ngā mōhiotanga me ngā pūkenga e eke panuku ai ia i ngā ara umanga huhua.

Mā ō kōrero arotake e hāpai te putanga o tētahi marautanga e mārama ana, e arorau ana ka whakatairanga i te tautika me te kairangi mō ngā mokopuna katoa e ako ana i ngā horopaki reo Māori.

E tono ana kia whakahokia mai e koe he kōrero mō te wāhanga ako o Pūmanawa Tangata.

E kitea ai he mōhiohio anō, tēnā tirohia te pānui whakamōhiohio nei - Pūmanawa Tangata.

E tuwhera ana te wā arotake tae atu ki te Paraire, te 5 o Hune 2026.
Ngā Kōrero mō ngā tikanga Tūmataiti

Kāore mātou i te pātai atu kia whāki mai tō tuakiri i roto i tēnei puka arotake. Ka pātai atu mātou ki a koe mō ētahi kōrero e pā ana ki a koe, pērā ki te rohe e noho nei koe, tō iwi mātāwaka, me tō wāhitau īmēra. Ka pātai atu mātou i ēnei pātai kia pai tā mātou tātari i ngā kōrero ka tae mai ki a mātou, ā, ka whakapā atu pea mātou ki a koe mō ō kōrero nāhau i tuku mai ki a mātou mēnā ka whakaae koe. Ka whai wāhi tonu ērā atu ō āu kōrero, mēnā rānei koe ka whakautu mai i ngā pātai nei.

Kāore mātou mō te whāki, mō te tuku atu i ngā īngoa o ngā tāngata, ngā tōpūtanga rānei i roto i ngā pūrongo ka tuhia e mātou mai i tēnei tukanga arotake.

Ka whakamahi mātou i te Survey Monkey hei kawe i tēnei puka arotake. Whai muri tā mātou tiki ake i ō kōrero mai i te Survey Monkey, ka rokirokitia ō whakautu ki tētahi pūnaha pākihi haumaru i te Tāhuhu o te Mātauranga, ā, ko ngā kaimahi o tēnei kaupapa arotake anake ngā tāngata ka taea te uru atu ki ō whakautu. Tērā pea ka ākina te tukua ō whakautu mehemea ka tonoa ērā i raro i ngā ritenga o te Official Information Act. Mehemea me mātua tuku e mātou ō whakautu, ka whai mātou ki te tiaki i tō mana tūmataiti, tae atu ki te tiaki i tō tuakiri i roto i te whānuitanga o te āheitanga ka whakaaetia e te ture. Kei a koe te motika ki te tiki atu i ngā mōhiohio e mau nei mātou e pā ana ki a koe, me te tono kia whakatika mātou i aua mōhiohio hoki. Nō te mea, kua tuhia kia noho kirimuna tēnei puka arotake, me mātua mōhio koe kāore pea mātou e taea te tautohu, te hono atu rānei i a koe ki ō whakautu.

Ka rokirokitia ō whakautu i a mātou e whakaoti ana i ngā mahi tātari me ngā mahi pūrongo, mō te ono marama hoki, i mua i tā mātou porowhiu i runga i ngā ritenga haumaru.